導語：《百變星君》是由葉偉民導演，周星馳，梁詠琪，吳孟達等主演的奇幻科幻喜劇片，下面YJBYS小編分享《百變星君》粵語劇本，可以幫助大家學習粵語哦。
(鬧鐘響，阿達起身開工)
阿達(撞親個頭)：哎吖!死嘞!死嘞!夠鍾!開工!開工!開工!
阿達(同只奶牛打招呼)：早晨呀，Ivy!嗱?走嚇譁?出嚟!出嚟畀我揸!朝朝都系噉揸你咋嘛，出嚟呀!(踢奶牛)出嚟喇嘛!
阿達(揸牛奶)：啊，Ivy你真系抵惜嘅，揸極都有!第日我娶個老婆系噉呢就唔慌餓死咯。
阿達(托住杯奶上樓畀李澤星飲)：大少!鮮奶!
(李澤星攞啲牛奶嚟啷口)
阿達：換過張床單佢!啊唔系，成張掉咗佢，聽日買張新床。
僕人：Yes, Sir!
(李澤星行去走廊，縱身跳入樓下嘅游泳池)
鬼妹：Hey, take a morning bath!
鬼妹2：Wash your hair, OK?
李澤星：今日輪到邊個洗腳呀?
鬼妹：Me.
李澤星：叫你洗腳咋，唔好洗第二度呀。
(李澤星喺幾個鬼妹簇擁之下行出屋企)
李澤星：一齊講我靚唔靚仔?
一眾鬼妹：好靚仔!
阿達(追上李澤星)：大少!大少呀!老爺打電話返嚟，佢話過兩日返嚟探你㖞。
李澤星：叫佢攞多一百萬美金過嚟!
阿達：夠唔夠呀?
李澤星：噉你講多啲啦!
阿達：啊!系!爹啲呀!我好乖呀，我好掛住你呀!我而家返學喇!快啲攞二百完返嚟畀我。
(李澤星踩空)
阿達：對唔住!對唔住!
李澤星：我堂梯去咗邊呀?
阿達(踎低身)：喺處!
(阿達同李澤星上咗直升飛機返學)
阿達：食雪糕呀!綠色襯返件衫呀!
李澤星：黑色一粒粒咩嚟架?
阿達：朱古力!
李澤星：綠襯黃吖嘛。綠襯黑嘅咩?(抌咗雪糕)
阿達：對唔住!
鬼妹：One two. Look at my shoes. Three four, knock at the door. Fix six, pick up sticks. Nine ten……(見到李澤星架飛機，四竄)
李澤星：我都話咗個黑柴著間條架喇。
阿達：系吖。
李澤星(見到王小虎)：王小虎㖞。
阿達：系吖，我認得佢屎窟呀!
李澤星：截住佢。
(李澤星同阿達跳飛機)
李澤星(拍王小虎膊頭)：走得去邊啫?
王小虎：星哥，我咪企喺度等你囉。
李澤星：上次唔好意思呀，我燒晒你成身啲毛，搞到你要紋眉同埋戴假髮，我都好後悔。
王小虎：算啦!我成家人都打你老竇工。況且我而家都好有型吖。
李澤星：你個冚家鏟又的確系眉清目秀。呢下真系吹你唔漲架，真系。嚟，整粒朱古力先。
王小虎：星哥，我真系受唔起呀。呢啲瀉藥我食得少咩?
李澤星：譁嚇，你醒目成噉樣樣?噉冇計喇，走喇!(轉身)
阿達：大少，就噉就算喇?
李澤星：冇辦法架啦，你睇佢個樣咁醒目，玩佢唔起架而家。
(王小虎見到地下有二百文美金，嗱嗱聲執起入袋)
李澤星：咦喂，我唔見咗兩嚿水㖞。會唔會畀人偷咗呢?
王小虎：噉報警逐個搜身喇，啲冧巴我抄低晒架喇。
(王小虎嗱嗱聲吞咗兩張銀紙，又一次中計)
李澤星：醒目仔!張銀紙好唔好味呀?都系瀉藥做架。入口即溶，五秒見效。
(王小虎想用手指勾返兩張銀紙，為時已晚，嗱嗱聲走入廁所)
阿達(扐出遙控器)：中計嘞啩?
李澤星：Hold it! Hold it! 等佢屙到一半先。
李澤星：爆!(王小虎暴殄天物)彈!(王小虎連帶個馬桶畀彈上天)
李澤星(揸住望遠鏡狂笑)：哈哈哈!
鋼牙妹：你知唔知噉整人好危險架?
阿達：喂，僆仔你邊瓣架?你大佬系邊個呀?
鋼牙妹：我阿叔系呢個嘅姜司教授。我喺度讀書架。
李澤星：我吩咐過豬兜唔准入嚟讀架㖞。
阿達：噉咪系，我都系洗咗黑錢至行得入呢間學校咋。
李澤星：你豬成噉洗黑錢都唔得啦，走啦!
阿達：走呀!
李澤星：走呀!
阿達：走呀!
鋼牙妹：人渣!
李澤星：慘得過我靚仔?
鋼牙妹：你亦唔靚仔!
李澤星：咩話?
鋼牙妹：你亦唔靚仔!
李澤星：你講咩?你噉嘅大話都講得出?你對唔對得住你自己良心?
阿達：算啦!
李澤星：對唔對得住你父母?
阿達：唔好同佢嘈啦!
李澤星：你對唔對得住呢個國家?你快啲開記者招待會澄清呀!如果唔系我煎你嘅皮，拆你嘅骨，飲你嘅血!
(姜司教授上堂)
姜司教授：人體系世界上最奇妙嘅嘢。而我嘅課程呢就係人體學裡便最尖端嘅課程。就係話人體嘅模仿性同埋適應性。就好似變色龍曉用保護色去模仿四周圍嘅顏色。而人類亦都同樣有噉樣嘅功能。
阿達：大少，請!
李澤星：睥咩呀?有書你就講!Get out!(坐低)
姜司教授：或者我舉個例吖。比如話，兩公婆，佢哋相處得耐咗。佢哋個樣就會慢慢變得相似。人哋話呢啲系夫妻相。其實呢，就係人體內嘅因子互相模仿。(烏低身問李澤星)呢位同學有咩意見噉呢?
李澤星：阿Sir，我成日對住啲女，又唔見我變咗啲女?
姜司教授(繼續講課)：人體系非常之脆弱嘅。我相信總有一日，我哋嘅身體大部分將會畀人造器官所代替。到時候，只繫留返個腦。人體器官將會被電腦控制。佢有好強嘅模仿能力，可以變任何嘅人，甚至任何嘅物件。
李澤星(擰頭)：唔知可唔可以變支雪茄呢?
姜司教授：理論上系可以嘅。呢位同學好似對呢個問題好有興趣噉噃。
李澤星：其實系對你有興趣。正話有件四眼鋼牙話我聽你係佢阿叔。我專登嚟睇嚇你有咩咁把炮。
姜司教授：我而家開始解剖，如果你可以望住多過三分鐘嘅，先至再講其他嘢。
姜司教授：我而家開始解剖屍體嘞!
(姜司教授開始解剖屍體)
同學甲：What's he doing?
同學乙：He's really crazy!
姜司教授：果然有膽識呀嚇。喺我嘅解剖堂，你係唯一一個可以企咁耐嘅。
*李澤星：超!我未有使舍過你呀真系!
姜司教授：如果你真系敢擘大對眼睇一次嘅話，我就話你把炮。
(李澤星暈)
(食堂)
李澤星：畀佢嚇嚇只腳又會軟成噉嘅真系!
阿達：我頭先攋咗尿，失陪一陣。
李澤星(坐低)：腳軟哩，鋼牙?
鋼牙：你好叻呀?夠膽食咗碟肉醬意粉佢!
(李澤星想嘔)
李澤星(彈起身)：我老竇系校董，我轉頭叫佢炒你阿叔魷魚。再趕你出校，賣你落吧跳脫衣舞!睺你跳跳嚇嗰陣，再炒你魷魚!
姜司教授(食緊面)：冇人可以炒到我嘅。我係美國政府聘用嘅高階科學顧問。嚟呢度，只系做客席教授。
李澤星：炒你唔到就攞去炆，炆完再炸都重得呀!
姜司教授：估唔到你就係全校最令人討厭同作嘔嘅二世祖。果然聞名不如見面。
李澤星：你講咩呀?我老竇系校董呀!
姜司教授：如果你老竇唔系校董嘅話，你一早就畀人打死咗嘞!
李澤星：Shut up!
姜司教授：你夠膽就話畀人知你老竇唔系校董，你睇嚇情形會系點?
李澤星：我話你聽吖，我老竇唔系校董，又如何呀?
(姜司教授同鋼牙妹支箭噉標出去)
(李澤星畀人狂毆)
(李澤星半夜潛入姜司教授實驗室)
姜司教授：個仆街累我畀人打鑊金嘅。呢個仇我一定要喺今晚報!
阿達：系吖!系吖!
李澤星：左便!左便!
阿達：右便!右便!
李澤星：唔系!哎吖!譁!你小心啲啦!家嚇棍撞棍嘞!
阿達：對唔住呀大少，有冇撞瘀到呀?攞樽油同你捽幾下。
李澤星：死開啦你!快啲過嗰便上樓梯摷嚇。
阿達：大少，冇理由上樓梯架㖞。實驗室多數喺地牢嚟架。咦，呢度似喇。(開門)大少，真系呢度呀。
李澤星：譁嚇，咁大個地牢呀?有排玩喇!擺喺嗰度先。
阿達：譁，你話踩到呢個捕獸器呀，唔死都殘廢呀!
李澤星：你去邊呀?
*阿達：冇，我驚佢踩唔中呀，擺啲蕉皮喺處幫幫佢吖嘛。
李澤星：哎吖，好計吖。
阿達：多謝!搞掂!
李澤星：喂，呢啲喉同我拆晒佢!每條屙涿尿落去裡便。
阿達：好呀。(屙尿，見到一隻手經過)大少大少，正話我見到有隻手喺嗰度飆過呀。
李澤星：屙尿啦你。
阿達：真架!呃親你保佑我冇仔送終。
李澤星：睇你個樣梗冇仔送終啦。就算有都系畸形架啫!
阿達：噉又未必。
阿達(用支電筒喺度照嚇照嚇，身後竄出一對眼)：睥咩呀，僆仔?(突然醒覺)啊!大少大少!我啱啱見到有對眼呢，乜都冇淨系得對眼。凌空噉睥住我㖞。
李澤星：凌空睥?
阿達：凌空睥!
李澤星：噉你想我點啫?
阿達：冇，我就想請教嚇，遇到噉嘅情況應該點樣做?
李澤星：嗱，畀著我呢，我就一嘢插爆佢雙眼。你使唔使睩大隻眼，等我示範一次畀你睇冇?
阿達：唔使，唔使。
(對眼又蒲頭)
李澤星：吆!咩嚟架?做咩呀?咦，佢睥咩呀?系咪就係“凌空睥”呀?
阿達：就係“凌空睥”囉。
李澤星：插佢!
阿達：死喇!
李澤星：見點呀你?
*阿達：
李澤星：做咩啫?
阿達：唔知呀，咩嚟架?
李澤星：等我嚟處理!
阿達：呢下唔得。細力啲，細力啲得架喇。
李澤星：走?唔好走!差人，企喺度!重捉你唔到?出嚟!我叫你出嚟呀!細路你匿喺度做咩呀?攞個身份證睇嚇。
半人：冇帶!
阿達：
李澤星：啊!——(奪路而走)救命呀!——
(阿達自食其果)
阿達：等埋我呀!救命呀!——
(鋼牙妹屋企)
警員：Check it.
鋼牙妹：Don't believe them. They are crazy. They are really crazy.
警員：OK,OK! Don't worry. We'll handle it. Calm down.
(地牢)
探長：李生，我哋搵咗大半個鐘頭呀，都搵唔到你講嗰只識行嘅手板，重有識及嘢嘅眼，都冇出現過呀。
李澤星：混賬!我工人啱啱畀只怪手差啲通櫃。
阿達：咩差啲呀?直情通咗兩吋，通咗兩吋呀!
李澤星：前後四吋。
阿達：前後四吋。
姜司教授：我呢個學生就最有想像力架嘞。咪由得佢玩多陣囉。
李澤星：教授!我思疑你係一個極度心理變態者。更加相信你殺害咗一百幾十個無辜嘅人，將佢哋嘅手手腳腳斬落嚟進行殘酷嘅科學實驗。
姜司教授：你真繫有偵探嘅頭腦。但系你奈我咩何?你搵到啲手手腳腳先講啦!
(李澤星轉眼見到一隻手)
(李澤星搵個錘仔撲落去，原來系阿達隻手)
李澤星：撞鬼你咩?擺隻手喺度揚嚇揚嚇。
阿達：我見頭先隻手咁鹹溼，一定系公嚟架。所以特登扮只乸諗住引佢出嚟噉解之嘛。
李澤星(指揮探長做嘢)：嗱!你而家派兩個人過嗰便睇睇，我同兩個人上便及及，阿達你過去嗰便攞指模。
探長：我至系探長呀，你唔好再喺度扮探長呀!(推開李澤星)
李澤星：嗱，我老竇呢就係……(李澤星畀幾個人“ung2”出實驗室)
阿達：大少!
姜司教授：拜拜!行得開嘅，聽朝返嚟上堂啦!
(阿達喺出便偵察)
(阿達返去)
(阿達開門)
(阿達畀撲咗個頭)
阿達：做乜打我㖞大少?
李澤星(一身棒球員打扮)：叫咗你敲三長兩短暗號架嘛。
阿達：出便冇人架嘛。
李澤星：嗰個姜司教授殺人狂魔嚟架。我識穿咗佢，佢一定諗辦法嚟殺死我架嘛。唔系我使鬼叫你請六條茂尼嚟保護我咩?重有呀，我叫你請保鏢咋，唔系請model呀。而家佢哋叉起條腰個死款，邊有執行架?
阿達：佢哋淨系識叉起條腰架咋。
李澤星：咩呀?
阿達：啊，(睇表)講起夠鍾添。收工!
六盲人：Yes, Sir!
李澤星：咩意思呀?
阿達：盲架嘛。大少，成個夏威夷都冇人願打你工。唯有喺盲人學院請呢扎茂尼嚟頂住檔囉。所以咪……
李澤星：如果我數到三重見到你，我就噬落去。三!(撲阿達個頭)
阿達(執起頂帽)：點解佢唔數二嘅?(撞到黃一飛)啊，老爺!
黃一飛：我要畀個爆棚驚喜佢。
(黃一飛畀撲咗一鑊)
李澤星：爹啲!
黃一飛：仔呀!
李澤星：媽咪!
朱咪咪：仔呀!好硬正呀你!
李澤星：你冇嘢吖嘛你?
黃一飛：哦，我冇事，邵爵士個氣功師傅教咗我上乘嘅氣功吖嘛。所以你一撲落去呢，支棍子攣咗，我冇事架。嗱，而家就喉嚨又唔通啦，又冇嘔血啦。個肺又好舒服啦。淨系黐咗線之嘛。
李澤星：系?
黃一飛：系!唔信我拉開鏈畀你睇嚇。我啲總掣線黐埋咗架嘛而家。
朱咪咪：啋!撞鬼你咩?
黃一飛：你唔好搞我呀，而家秦始皇打到嚟呀!你快啲頂住，我要救世人呀!
阿達：我去睇睇佢吖。
(門鐘響)
李澤星：敵人到呀，準備!
李澤星：我開門引開佢注意力。你兜去後便噍佢!
阿達：呣!
孫佳君：Hi!
(李澤星睇到暈晒浪)
(李澤星撲暈阿達)
李澤星：小姐你冇嘢吖嘛?
孫佳君：冇嘢呀，呢個咩人嚟架?
李澤星：唔知㖞!系賊嚟啩。小姐你有咩吩咐呢?
孫佳君：我叫Bonnie呀。我住響對面屋嘅。我屋企個沖涼缸壞咗。
李澤星：唔系啩?
孫佳君：唔知可唔可以借個地方衝嚇涼呢?
(游泳池邊)
李澤星：我通常都喺呢度沖涼嘅。洗頭水，護髮素，隨便揀。重有隻鮑魚刷喺水底。
孫佳君：唔錯呀。話時話吖，你換衫都換得幾快㖞。
李澤星：其實我剝人啲衫重快呀。
孫佳君：唔信!
李澤星：譁，噉叫跳水呀?我悽!(揸起一對胸罩)邊個嘅呢?
朱咪咪：我架!
李澤星：喂!大佬呀!你唔怕畀人笑都因住啲狗會吠吖大佬!(跳落水)
朱咪咪：喂喂喂!你老竇暈咗呀!
李澤星：再毆多佢兩棍醒返架嘞!
朱咪咪：你去睇嚇佢啦!
李澤星(同孫佳君講)：跳水咁叻，等我幫你擦嚇背先。
孫佳君：喂，呢支嘢好似洗廁所架㖞。
李澤星：啱吖，而家洗廁所啦而家咪。
孫佳君：耶!好衰架你!
朱咪咪：你就嚟連你老竇姓咩你都唔記得架你!
李澤星：話時話真系唔記得咗㖞!咦，阿嬸，你都好面善㖞。搵邊位呀你?
朱咪咪：我生嚿叉燒好過生你呀!
李澤星：生我係副作用啫，享受制造過程之嘛你!
朱咪咪：噉又系。
李澤星：涼就就嚟衝完喇!跟住去邊度wet好呢?
孫佳君：去wet?我冇諗過㖞。不過如果有人同我洗嚇腳趾呢，我或者會有靈感嘅。
(酒吧)
李澤星：咩嚟架?
孫佳君：Mental illness drop.
李澤星：即系咩呀?
孫佳君：忽得呀!Yeah!
李澤星：Yeah!(猛摳自己嘅口)
孫佳君：喂!做咩呀你?想吐返出嚟呀?
李澤星：系吖，我想睇清楚個牌子，再買返一百幾呀粒看嚇門口之嘛。
孫佳君：唔使啦，我你度大把，嚟吖。(將成幾十粒忽得灌入李澤星嘅口中)
李澤星：Yeah!
侍應生：Good evening, what can I serve you?
孫佳君：Seven Tequila.
李澤星：即系Tequila加Seven-up
孫佳君：No! Seven Tequila. 一人七杯吖!
李澤星：Yeah!
(孫佳君同李澤星一齊飲酒)
(李澤星將成杯酒潑喺孫佳君面上)
李澤星：你當我傻架，八婆?
主持人：Ladies and gentlemen. Now it's the time you've all been waiting for. The world's most famous twist contest!(眾人鼓掌)Yeah! First, let's see who our champous will be tonight. The winner will receive a mystery prize.
孫佳君：不如我哋去跳舞吖。
李澤星：跳舞我唔識架㖞。
孫佳君：如果你贏咗嘅，我今晚陪你瞓吖。
李澤星：Bonnie，我諗你睇錯人。我並唔系一個貪圖女色嘅人。Understand?
孫佳君(驚惶失措)：喂喂喂!攬住我吖。
李澤星：唔好咁心急得架。
孫佳君：我老公嚟咗呀。
李澤星：有噉嘅事?
孫佳君：你擰轉頭睇嚇吖。行緊去吧嗰便呀。
李澤星：譁!乜你十幾個老公架?
孫佳君：唔系吖，系我老公同佢啲保鏢呀。
李澤星：你老公開保安公司嘅咩?
孫佳君：唔系吖!佢系搞組織架。
李澤星：系?民主黨定共和黨呀?
孫佳君：山口組呀。
李澤星：Yeah! 拜拜!(想鬆人，好衰唔衰畀個主持人捉住隻手，呢次冇死咯)
主持人：I know how's the result. The winners are Mr. Lee Chak Sing and his lovely lady.
(李澤星想走)
主持人：Wait, give the lady a kiss, give the lady a kiss!
(富田憤而起身)
富田頭馬：二五仔嚟咗呀。
(公路)
孫佳君：好衰架你!要人揸車自己又唔揸。你做咩唔出聲啫?你瞓著咗呀?啊?你做咩成口白泡架?喂喂!你點呀?喂!喂!喂!你唔好暈呀!喂!(擺低李澤星喺地下度)喂!你點呀?(手忙腳亂)唔系!唔系!喺邊呀?(喺櫃桶度攞出一支超大嘅針)是但啦!
孫佳君：系吖!佢真系OD呀。我有晒架撐架，你快啲過嚟救佢啦。我求嚇你吖!
電話另一頭：嚟到佢都死啦!你自己搞掂佢啦!你又唔系第一次。
孫佳君：厾人我唔掂架。我畀人厾先至得架咋嘛。
電話另一頭：你唔識都要識架嘞!唔系死喺你屋企重大鑊呀!嗱，我而家去搵本說明書教你，你等我一陣呀。
電話另一頭：喂喂!嘜咗位未呀?
孫佳君：嘜咗喇!
電話另一頭：佢系服食過度毒品，引致心臟衰竭，動脈萎縮，預防反常膨脹。要同佢進行動脈注射，刺激心臟。噉先有得救架。
孫佳君：唔好啦!
電話另一頭：你點都要搏嚇架嘞。攞咗針未呀?
孫佳君：攞咗喇。
電話另一頭：唔好理咁多，一嘢拮落去喇!
(李澤星劇痛，將孫佳君撞暈咗)
電話另一頭：喂喂!
李澤星(扐起電話)：喂!
電話另一頭：你醒返喇?
李澤星：我醒返喇!條女暈咗咋。
電話另一頭：嚇?噉支針插咗去邊度呀?
*李澤星：插咗喺我褲浪對上左手便。
電話另一頭：十個男人九個擺左邊架㖞。你呢?
李澤星：我好彩呀，啱啱第十個，擺右邊嘅。
電話另一頭：噉恭喜你㖞。但系我袋擺左邊呀。
李澤星：冇嘢嘞!拜拜!
(出便)
畫外音：唔關我事架，唔關我事架，唔好呀!No!
富田(扚起一個人)：你個仆街!我畀咁多錢你，叫你喺政府嘅電腦度改少少嘢。你厾我背脊?
手下：Boss, don't kill me! Don't kill me. Don't kill me.
富田頭馬(擦鞋)：大佬，呢輪你啲廣東話真繫好掂。
富田：呢輪同我條女講得多。自不然就掂架喇。搞掂埋你先。
手下：Don't kill me! Don't kill me. Don't kill me.
富田：你叫我唔殺你，就唔殺你?我點做大佬呀?
手下：畀個機會我呀。畀個機會我呀。
富田：好!我就畀個機會你。等你死都死得眼閉。等個衰婆同個姦夫返嚟，齊齊攞去大海，餵魚!(開槍)
(李澤星擇路而逃)
富田：Get him!
(李澤星開跑車逃走)
富田：Shit! Fuck! 冚家鏟!
富田頭馬：What is “冚家鏟”?
(HAWAII DIAMOND HEAD POLICE STATION)
探長：你搞乜嘢呀?尋日又話姜教授屋企有手有腳會行會走!今日就話有人要殺你。Get out! 你走呀!
李澤星：……
(李澤星慌慌失跑返屋企)
(朱咪咪拍佢膊頭)
李澤星：阿媽，阿媽，好大鑊，好大鑊，好大鑊。
朱咪咪：好大鑊呀我!
李澤星：你聽我講吖!
朱咪咪：咦!你聽我講啦!
李澤星：我畀人揸槍啡呀。
朱咪咪：啡都唔算大鑊呀!我有嘢同你講呀!
李澤星：你有咩新嘢講呀?來來去去叫我畀心機讀書。我一留都系架啦。
唔系吖!我今次有新嘢講呀!你老竇李一飛其實唔系你親身老竇嚟架。
李澤星：我知呀，廁所達先系吖嘛。
朱咪咪：啊?!你點知架?
李澤星(掩面)：我今日撲傻咗老竇啫，我冇撲你吖，你發咩神經啫，喺度?
李一飛：傻?!(行雷閃電)撲溼我個頭，以為我傻咗乜都唔知。佢兩個姦夫淫婦，將過去嘅醜事揚晒出嚟。我先至知道你唔系我嘅仔!(又一次行雷閃電)
李一飛：我都知道事有蹺蹊。我嘅綽號系台山湯告魯斯，男中嘅極品。但系，生個仔好似坺屎噉。
李澤星(擺手)：我完全唔知你哋噏咩，總之我要二百萬。邊個畀二百萬我，我就認邊個做老竇。
阿達(手揸二百文紙)：二百文我有。
李澤星：二百萬!喂!你返入去洗廁所啦!
阿達(追溯往事)：二十五年前，有一晚，我喺柴房睇緊鹹書，你阿媽光脫脫噉衝入嚟熄咗眼燈。
朱咪咪：喂喂喂!你唔好亂講呀!嗰晚我有著襪架。
阿達：對唔住，我記錯。你當日著住一對白襪仔。老爺嗰晚唔喺屋企。我一時控制唔到就同你阿媽……。開返燈之後，我好後悔。
*李澤星：所以話你睇鹹書你話有咩謂呢?但系你好收聲喇，你唔好再噏喇!
朱咪咪：喂喂喂!唔好呀!仔打老竇會畀雷劈架。
李澤星：邊個話佢系我老竇?你話系就係呀?有咩證明呀?
哎吖，粵語殘片話齋，老竇跪仔，個仔會暈架。
李澤星：嚇譁?你跪低睇嚇我會唔會暈?跪吖!
(阿達跪低，李澤星頭暈)
朱咪咪：嗱，嗱，嗱，系咪呢?暈喇!暈喇!
李澤星：我乜事都冇呀!死未?(同阿達咬耳仔)你唔好喺度搞搞震吖嗱，我重有大好前途架。
李一飛：喂!呢度有張二百萬嘅支票，如果你認我做老竇嘅呢，我前事不計重陸續有嚟。如果唔系嘅呢，你知道會點架啦!
(李澤星收下二百萬支票)
李澤星：多謝阿爸!
(李一飛抱住李澤星)
李一飛：系!噉先至系吖嘛乖仔。嗱，正所謂識時務者為俊傑吖嘛。
朱咪咪：你噉即系大逆不道呀!唔好呀!
(李澤星趕阿達扯)
李澤星：Get out!
阿達：唔認我唔緊要。
李澤星：躝啦!
阿達：自細到大我都縱容你，其實系害咗你。
李澤星：小心講嘢吖嗱，我報警拉你呀。
阿達：我老實同你講，你係一個極度令人討厭令人作嘔嘅人。
李澤星：講吖!
阿達：我希望你以後識得點樣尊重人，人哋先會尊重返你。(李澤星兜咗阿達一腳)
(李澤星開門，將阿達踢出門)
李澤星：走啦契弟!
阿達：你就契弟!生得你出有權話你!“yang3”我都夠膽死!
(教堂)
四眼鋼牙：喂!稟神嗱?
李澤星：你唔驚我嘅咩?
四眼鋼牙：我驚你有牙呀?我夠有鋼牙咯。你唔開心咩?
李澤星：我見到你有乜法子開心啫?
四眼鋼牙：噉我走嘞㖞。
李澤星：快啲吖唔該。(四眼鋼牙掉頭走)
李澤星：喂!過嚟!(四眼鋼牙坐喺李澤星身邊)我有個朋友呀，佢為咗錢唔認自己親身老竇。
四眼鋼牙：噉點呀?
李澤星：冇咩，系噉啫。
四眼鋼牙：噉走先嘞。
李澤星：喂喂喂!佢重趕咗個老竇出門口，兼且伸咗佢一腳。當其時行緊雷落緊雨。你覺得佢個人點?
四眼鋼牙：禽獸都不如囉。
李澤星：但系佢好靚仔架㖞。
四眼鋼牙：哦。噉都好啲。唔系就要拉去打靶架嘞。
李澤星：講開先講吖嗱，你覺得我又靚仔成點?
四眼鋼牙：我蟲蟲向天發誓，你一啲都唔靚仔哩。
富田頭馬：今晚成屋得返佢一個人咋。
李澤星(一身棒球員打扮)：仆街吖!
富田頭馬：Move it!
李澤星：真系嚟呀。
富田頭馬：你係咪想打911報警?
李澤星：得唔得呀?
富田頭馬：隨便。
李澤星：911幾號電話話?
(黑鬼一槍都射唔中李澤星)
黑鬼：Sorry!
(李澤星跳落樓)
(阿達將啲燈全部熄滅)
富田頭馬：邊個熄燈?
富田頭馬：咪走呀!
甲：做咩成碌木噉企喺度呀?
乙：我點知佢會撞過嚟㖞。
富田頭馬：追佢呀!呢間屋太大嘞，炸咗佢先。
(光頭佬開晒啲燈，得意之際畀李澤星撲咗一棍)
李澤星：我妻!
阿達：重有!
李澤星：Yeah!
阿達：Yeah!(撲多一棍)
李澤星：話時話你返嚟做咩啫?
阿達：我根本冇走過。
李澤星：唔好喐!攞支槍過嚟!隻手唔好亂喐呀!慢慢遞過嚟。快啲!咪諗埋晒啲衰嘢呀!隻眼鬼鬼鼠鼠以為戴副超我睇你唔到呀嗱?你唔好制呀你!(攞到支槍)我叫你攞支槍過嚟吖!
富田頭馬：你咪攞咗囉。
李澤星：哦。OK.(用槍頂住富田頭馬個頭)咪喐!
黑鬼：咪喐呀!你朋友喺我手上!
李澤星：我叫你咪喐呀!你大佬喺我手上呀!
黑鬼：你咪亂嚟呀，我哋交換人質。
李澤星：換你老母!即刻放返我朋友，如果唔系我一槍就打爆佢個死人頭!
黑鬼：OK! OK!
(阿達跪低，李澤星暈低)
李澤星：你跪喺度做咩啫?
阿達：我個仔嚟架，受唔起呀。一跪佢就會暈架嘞。
富田頭馬：Hello! Goodbye!
(計時炸彈好快就嚟爆)
李澤星：呢條蠢人，有槍唔用，佢系要用炸彈。呢鑊佢百密一疏嘞。
阿達：留低把刀㖞。
李澤星：重記唔記得我哋個彈弓廁所呀?
阿達：彈阿王小虎嗰個?
李澤星：就喺你隔籬咋。
阿達：哦?個廁所一次可以彈幾多人上去架?
李澤星：一個。
阿達(睇嚇個計時炸彈)：啊，唔驚!重有個幾鐘頭，彈完一個，咪又一個囉。
李澤星：配返個眼鏡啦!剩返十秒咋。
阿達：把刀斬唔斷條鏈架。你斬斷我只手自己走啦!
李澤星：呢啲嘢唔使你教吖!(斬斷自己隻手)我成世未對你好過。呢鑊補返數啦!阿爸!
阿達：阿仔!
李澤星：坐低啦!(撳遙控器，阿達畀炸到九霄雲外)
(鋼牙妹畀一個閃電嚇醒)
鋼牙妹：啊!
姜司教授(喺出便敲門)：蟲蟲，你冇事吖嘛?
鋼牙妹：我冇事呀。
姜司教授(入嚟)：你發惡夢呀?
鋼牙妹：系呀!我見到李澤星畀人炸到粉身碎骨。好得人驚呀!
姜司教授：你平時咪好憎佢嘅?點解發夢都會夢見佢架?
鋼牙妹：噉我又真系幾憎佢架。
姜司教授：我記得嘞!有個心理學家話呢，最吸引女人嘅就係嗰啲衰男人嘞!
鋼牙妹：耶!其實佢都唔系咁衰架咋。佢今日都識得去教堂嗰度懺悔。佢衰硬頸咋!驚我笑佢。佢幾可憐架，一個朋友都冇。
姜司教授：其實呢，佢繫個聰明仔嚟架。如果唔系，點可以諗到咁多橋嚟整蠱人啫?
(電話響)
姜司教授(拎起電話)：Yes.
電話另一頭：Doctor Chang please.
姜司教授：Speaking.
電話另一頭：有個病人叫李澤星，佢畀人炸到粉身碎骨呀。請你快啲返嚟醫院吖。
鋼牙妹：做咩事呀，阿叔?
姜司教授：哎吖，原來你唔系發夢呀，系真架。
(醫院)
阿達：教授!教授!我個仔點呀?
姜司教授：你冷靜啲，喺一般嘅醫學角度嚟講，你個仔已經死咗。
阿達：嚇?
姜司教授：但系對於我嚟講，佢只系死咗一半。
阿達：噉即系點呀?
(姜司教授揭開個蓋，阿達見到個仔剩返個嘴)
李澤星：阿爸，系咪你嚟咗呀?
阿達：啊?做乜淨系得個嘴架?
姜司教授：系吖。
李澤星：教授冇話你知咩?我周身散晒，死剩個腦同把口咋。
姜司教授：哎，你唞唞先。
阿達：唔好講嘢喇。
姜司教授：我講一個好訊息同一個壞訊息畀你知。
阿達：咩呀?
姜司教授：好訊息呢就係我同你提過啲人造器官嘅?美國政府已經發明咗嘞。佢哋可以保留兩樣嘢，而其他呢，全部用人造器官代替。可以幫你個仔砌返一模一樣。
阿達：噉快啲砌吖，快啲砌吖。
姜司教授(引薦)：呢位昆西醫生，就係呢度嘅主診醫生。
阿達(同昆西醫生扼手)：昆西醫生嚇譁?你好!你好!呢個系我個仔嚟嘅，唔該你幫幫手救救佢條命吖。唔該!
姜司教授：聽我講埋先，重有個壞訊息。要畀六千萬美金佢，先至肯做手術架。
阿達：對唔住呀，我冇咁多錢。
姜司教授：冇錢冇得傾架!
阿達：唔怕!我打畀佢個便宜老竇。(講電話)我明白架嘞，老爺。你自己同佢講吖。
李一飛：阿星，錢我大把。但系唔準你再見廁所達。如果唔系我同你脫離父子關係。最多以後得閒飲茶算數。
李澤星：其實我呢幾日已經諗得好清楚架嘞李生。我哋得閒飲茶算喇!
李一飛：好，既然你死性不改呀，你以後自生自滅喇!
阿達：點解你咁蠢啫?
昆西醫生：Oh Jesus, you're wasting my time. I can't believe it.(行開)
姜司教授：乜咁現實架?真系一啲人情味都冇。
阿達：六千萬我冇呀仔，六千文或者有。
姜司教授：哎，你真繫有六千文?好，我蝕底啲殺咗你。貴有貴做，平有平做嘅啫。夠唔夠膽搏一搏呀?
(姜司教授嘅實驗室)
(姜司教授喺度努力工作)
姜司教授：抹汗!(阿達同姜司教授抹汗)搞掂!
阿達：辛苦晒!辛苦晒!
姜司教授：趁熱食咗佢呀。
阿達：好呀!好呀!
姜司教授：我煮嘅牛肉麵，包你食到舐舐脷呀!
阿達：個衰仔黑口黑麵，都系畀佢食先嘞!嚟呀，乖仔，嗱，碗麵你食先嘞!
